تمام تعریفیں اللہ رب العزت کے لیے ہیں، جو تمام جہانوں کا پروردگار، بے حد رحم فرمانے والا اور اپنے بندوں پر بے شمار نعمتیں نچھاور فرمانے والا ہے۔ انسان اگر اپنی زندگی پر غور کرے تو اسے ہر طرف اللہ تعالیٰ کی رحمت اور نعمتوں کے آثار نظر آئیں گے۔ ہماری زندگی، ہماری سانسیں، صحت، رزق، رشتے، خوشیاں اور سکون، سب اسی کی عطا ہیں۔
ہم اکثر اپنی خواہشوں اور پریشانیوں میں اس قدر الجھ جاتے ہیں کہ ان نعمتوں کو بھول جاتے ہیں جو ہر لمحہ ہمارے پاس موجود ہوتی ہیں۔ ذرا سوچیں، اگر سانس لینے کی نعمت نہ ہو، دیکھنے کے لیے آنکھیں نہ ہوں، سننے کے لیے کان نہ ہوں اور محبت کرنے والے رشتے نہ ہوں تو دنیا کی بڑی سے بڑی دولت بھی کس کام کی؟
اللہ تعالیٰ نے ہمیں صرف نعمتیں ہی نہیں دیں بلکہ ہماری بے شمار خطاؤں پر پردہ بھی ڈالا۔ ہم کمزور پڑتے ہیں تو وہ ہمیں سنبھالتا ہے، ہم راستہ بھٹکتے ہیں تو ہدایت کی طرف بلاتا ہے، ہم غمگین ہوتے ہیں تو اپنے ذکر کے ذریعے دلوں کو سکون عطا فرماتا ہے۔ جب دنیا کے سہارے کمزور پڑ جاتے ہیں، تب بھی اللہ کا سہارا باقی رہتا ہے۔
قرآن کریم میں اللہ تعالیٰ ارشاد فرماتا ہے:
وَ اِنْ تَعُدُّوْا نِعْمَةَ اللّٰهِ لَا تُحْصُوْهَاؕ-اِنَّ اللّٰهَ لَغَفُوْرٌ رَّحِیْمٌ
ترجمہ، کنزالایمان: اور اگر اللہ کی نعمتیں گنو تو انہیں شمار نہ کرسکو گے بیشک اللہ بخشنے والا مہربان ہے۔
(سورۃ النحل:18)
واقعی انسان اللہ تعالیٰ کی نعمتوں کو شمار نہیں کر سکتا۔ ہماری ہر سانس ایک نعمت ہے اور ہر نیا دن اللہ کی طرف سے ایک موقع ہے کہ ہم اپنے رب کو یاد کریں، اس کا شکر ادا کریں اور اپنی زندگی کو اس کی رضا کے مطابق گزارنے کی کوشش کریں۔
خوشی کے لمحوں میں اللہ کا شکر ادا کرنا آسان محسوس ہوتا ہے، لیکن اصل شکر یہ ہے کہ آزمائش کے وقت بھی دل اللہ سے جڑا رہے۔ جب حالات ہمارے مطابق نہ ہوں، تب بھی ہمیں یقین رکھنا چاہیے کہ ہمارا رب ہمارے لیے وہی فیصلہ فرماتا ہے جس میں ہمارے حق میں بھلائی ہوتی ہے۔
اس لیے زندگی کے ہر حال میں ہماری زبان پر ہونا چاہیے:
الحمداللہ علیٰ کل حال
ہر حال میں اللہ کا شکر ہے۔
ہماری خوشی بھی اسی کی عطا ہے، ہمارے صبر کی توفیق بھی اسی کا کرم ہے، ہماری کامیابی بھی اسی کی بخشش ہے اور ہماری مشکلات میں آسانی بھی اسی کی رحمت سے آتی ہے۔
اے اللہ رب العزت! ہمیں اپنی بے شمار نعمتوں کی قدر کرنے والا بنا، ہر حال میں تیرا شکر ادا کرنے کی توفیق عطا فرما، ہماری خطاؤں سے درگزر فرما اور ہمیں اپنی رضا و خوشنودی کے راستے پر چلنے والا بنا دے۔
آمین یا رب العالمین۔
از قلم: عظمیٰ فاطمہ بنت محمد میاں خان
